Nafarroako Parlamentuan Euskaltzaindiaren iraileko osoko bilkura egin da gaur. Unai Hualdek aukera baliatu du, Europako Kontseiluak euskararen errealitateari buruz egindako txostenaren ondorioei dagokienez, agerian uzteko beharrezkoa dela "inteligentziaz" lan egiten jarraitzea, foru-arauditik eta epai judizialetatik eratorritako "baldintzatzaileak" iraultzeko, bere ustez hizkuntza-normalizazioaren aurka jotzen duten faktore nagusietako bi  baitira.

"Inplizituki, esan berri digute zonifikazioa euskara bultzatzeko eta berdintasunez erabiltzeko oztopoen artean dagoela. Bitxia da, eta, aldi berean, oso tristea, hizkuntza propioa babesteko eta sustatzeko aholkuak hain urrutitik etorri behar izatea. Egia da denbora asko daramagula egoera horri buruz ohartarazten, eta egia da, gero eta gehiago izan arren, ez dugula gehiengo nahikorik Euskararen Legea aldatzeko. Horregatik, hizkuntzan eta hiztunetan pentsatuz, ezin dugu gutxietsi aurrerapauso bakoitza, txikia izan arren. Itun bat beharko litzateke, eta iaz proposatu nuen foro honetan bertan. Inteligentziaz lan egiten jarraitu behar dugu", berretsi du Unai Hualdek.

Hala mintzatu da Legebiltzarreko lehendakaria Euskaltzaindiko kideak  agurtzean. Euskaltzainak zoriondu ditu egiten duten lanagatik, eta "Parlamentuarekin gure hizkuntza sustatzeko lankidetzan jarraitzeko" eskatu die. Espero dut, eta hori da nire nahia, legegintzaldi berri hau elkarlanerako eta lankidetzarako gune izaten jarraitzea, euskararen babesean eta garapenean elkarrekin lan egiten jarraitzeko ".

Amaitzeko, Unai Hualdek jardunaldi emankorra opatu die Nafarroako Parlamentuko osoko bilkuren aretoan –"Nafarroako herriaren borondatearen ordezkaritza sinbolizatzen duen aretoa"– bildutako euskaltzainei.

Euskaltzaindiaren osoko bilkurara bertaratu dira, besteak beste, Andrés Urrutia Euskaltzaindiko lehendakaria, Jean-Baptiste Coyos lehendakariordea, Adolfo Arejita idazkaria, Sagrario Alemán Nafarroako ordezkari eta Jagon Saileko arduraduna eta Miriam Urkia Ikerketa Atalaren arduraduna.