Ekonomia Sozialaren VI. Unibertsitate Asteko ekitaldi nagusia egin da gaur, apirilaren 1ean, Nafarroako Parlamentuan: Erro Kooperatiboak: Hezkuntza eta Enpresak Etorkizuna Eraldatzen jardunaldia, hain zuzen ere. Nafarroako Unibertsitate Publikoko Ekonomia Sozialaren eta Kooperatibismoaren Katedrak antolatu du. Hitzaldi eta mahai-inguruen bidez, kooperatibismoaren printzipio eta balioak aztertu dira, eta aztertu da, orobat, enpresa-eredu horrek nola laguntzen duen ekonomia bidezkoago eta jasangarriago bat izaten.

Ignacio Ugaldek, ANELeko lehendakariak, ongi-etorria emateko hitz gutxi batzuk esan ondoren, Nafarroako Parlamentuko lehendakari Unai Hualde arduratu da jardunaldiari hasiera emateaz. Esan duenez, gure komunitateko Parlamentuak, Gobernuak eta toki-entitateek “konpromiso garbia erakutsi dugu jasangarritasunarekin, lurraldeen arteko orekarekin eta kalitatezko enpleguarekin lotutako ekonomiari laguntzeko”.

“Nafarroako kooperatibismoak erakutsi du enpresa-jarduera bateragarria dela ikuspegi sozial eta gizartearekiko konprometitu batekin. Garapen jasangarriaren eta gure lurrarekiko errotzearen aldeko apustua egiten duten balioak eta printzipioak dituzten enpresak”, adierazi du Hualdek.

Jarraian, Carmen Maeztuk, Nafarroako Gobernuko Eskubide Sozialetako, Ekonomia Sozialeko eta Enpleguko kontseilariak, honako hau azaldu du: “gaur egun, 1.439 kooperatiba ditugu Nafarroan, eta datuak gora egiten jarraitzen du. Horrek agerian uzten du enpresa-eredu horrek ongi funtzionatzen duela, eta irauteaz harago, aurrera egiten eta hazten ari dela”.

“Kooperatibak enpresa-eredu gisa Nafarroa osoan zehar hedatuta egotea haien erresilientziaren erakusgarri da, eta gizarte ekitatiboago eta bidezkoago bat eraikitzearekin duten konpromisoaren erakusgarri”, jakinarazi du.

Gero, hezkuntzaren eta kooperazioaren esparruko ikerketan, prestakuntzan eta proiektuetan egindako aurrerapenak aurkeztu dituzte Iñaki Mendiorozek, Ekonomia Sozialeko eta Laneko zuzendari nagusiak, Sandra Caverok, NUPeko Ekonomia Sozialaren eta Kooperatibismoaren Katedrako zuzendariak, Maitane Buenok, Laboral Kutxako eskualde-zuzendariak, Lucas Álvarezek, Tafalla Iron Foundryko lehendakariak, eta Rafael Larak, NUPeko katedradunak.

Horren ondoren, EdukaCoop – Euroeskualdeko kooperazio-ingurune batean ereindako haziak ekimenaren aurkezpena egin da, eta zenbait enpresak azaldu dute nolakoa izan den beren esperientzia printzipio horiek hezkuntza-esparruan eta ikasleen artean sustatzean. Parte hartu dute Juanma Garrok (Lacturale), Miren Erañak (Ausolan) eta Isabel Elizaldek (Malerreka Common Zerbitzuak).

Jarraian, Kooperatibismo Lehiaketan finalista izan diren 3 ikastetxeetako bideoak ikusi dira, eta, horren ostean, elkarrizketa egin da ikastetxe horietako ikasleekin, jardueran izandako esperientziaren eta kooperatibismoari buruz ikasitakoaren inguruan.

Gero, sariak eta aintzatespenak banatu zaizkie ikasleei eta irakasleei.

Bukatzeko, Ignacio Ugaldek, ANELeko lehendakariak, eta Carlos Gimenok, Nafarroako Gobernuko Hezkuntzako kontseilariak, eman diote itxiera jardunaldiari.

Ugaldek eskerrak eman dizkie parte-hartzaileei bertaratzeagatik. Pozik agertu da, eta hitz hauek esan ditu: “asko harrotzen gaitu ikusteak gazteen kolektiboak jakin duela kooperatibismoaren balioak sormen eta konpromiso handiz hautematen eta adierazten”.

“Gure begien aurrean sortzen ari den gizarte berriaren enpresa-eredua gara”, gehitu du.

Gimenok, bere aldetik, hau gogorarazi du: exekutiboak “lankidetzan jarraitzen du ekonomia sozialeko enpresekin, ekintzailetza-proiektu eta -programa arrakastatsuen bidez. Lanbide Heziketako Inizia programa da horietako bat”.

“Ikasleek enplegu-tasa nabarmen handiagoak izateaz eta lan-merkatuko erronkei aurre egiteko hobeki prestatuta egoteaz gain, lanbide heziketa katalizatzaile ona izaten ahal da ekintzailetza sozialerako”, azaldu du.

Jardunaldia Parlamentuaren egoitzako atalondoan egin da, eta bertara hurbildu dira, besteak beste, Ainhoa Unzu lehen lehendakariordea, Juan Luis Sánchez de Muniáin bigarren lehendakariordea eta Yolanda Ibáñez lehen idazkaria, eta Miguel Bujanda, Ana Elizalde (UPN), Kevin Lucero, Maite Esporrín (PSN), Laura Aznal (EH Bildu), Itxaso Soto (Geroa Bai), Maribel García Malo (PPN) eta Miguel Garrido (Contigo -Zurekin).