Nafarroako Gobernuko Herritarrekiko Harremanetako kontseilariak, Ana Ollok, hizkuntza politika “positiboa” sustatzearen alde egin du, izan ere, euskara “Nafarroako gizartearen balioa da, Foru Komunitatearen elkarbizitza eta aniztasunaren balioa”.

"Erronka erraldoia dugu: gure hizkuntza-aniztasuna eta hizkuntzen bizikidetza demokratikoki kudeatzea, ahalik eta herritar gehienek gizartearen etorkizunarekin konpromisoa har dezaten", azaldu du.

Navarra Sumak Kontrolerako Osoko Bilkuran egindako interpelazio bati erantzunez, Ollok esan du Gobernuak bultzatzen duen hizkuntza politika "legegintzaldirako programa akordioan adierazitakoa" dela.

Akordio horrek, azaldu duenez, "Nafarroako errealitate historikoa, kulturala eta soziala mantendu eta babestu nahi du, eta berezko hizkuntzak honen parte dira".

Ollok azpimarratu duenez, euskara "Nafarroako berezko hizkuntzetako bat da, hizkuntza gutxitua, eta, beraz, Nafarroako herritar guztien mesederako berreskuratze prozesu bat behar du".

Ildo horretan, kontseilariak "zeharkakotasunean" oinarritutako hizkuntza-politika defendatu du, "politika publiko guztietan eragina izango duena; progresiboa eta errealitateari egokitua; eraginkorra, planifikatua eta ebaluatua; parte-hartzailea; arauen babesa izango duena; euskarari prestigio soziala emango diona, hori guztia askatasunean eta borondatean oinarrituta".

Arlo horretan egindako hainbat ekimen zerrendatu ondoren, sailburuak merituak ebaluatzeko dekretuari buruz hitz egin du, eta, aurreratu duenez, Gobernuak "ia amaituta ditu lanak. Laster aurkeztuko da, zerbitzu publikoek herritar euskaldunei arreta eman diezaieten, Euskararen Legeak jasotzen duen bezala".

Ollok Gobernuak aurreko legegintzaldian egin zuen euskararen lehen plan estrategikoa ere aipatu du, "jarraipena izanen du bigarren planarekin, pandemiagatik atzeratu den arren laster aurkeztuko dugu. Bigarren plan honek gazteei erreparatuko die bereziki, sektore horri zuzendutako hainbat ekintza biltzen ditu".

Iñaki Iriartek (Navarra Suma) uste du aurreko Gobernuak bultzatutako hizkuntza politikak "herritar gehienen diskriminazioa" zekarrela, eta galdetu du "nola den posible hizkuntza gutxitu bat sustatzeagatik gehiengoa diskriminatzea".

"Nafarroa plurala dela onartzen dugu, baina hizkuntza batekiko eta behar duen babesarekiko maitasun hori ez da onuragarria baldintza batzuk inposatzen direnean", esan du Iriartek, eta politika horiek euskarari "mesederik ez diotela egiten” gaineratu du. Hori dela eta, egungo Gobernuak "aurreko politikekin jarraituko duen" edo "beste politika batzuk" hautatuko dituen galdetu du.

Inma Juriok (PSN) aitortu du hizkuntzaren alorrean "ezberdintasunak" daudela Gobernuko kideen artean, baina hori "ahulezia beharrean, indar bat” dela baieztatu du. Politika publikoek "Lorafnarekiko, Euskararen Legearekiko, segurtasun juridikoarekiko eta herritarren eskubide eta askatasunekiko errespetuan" oinarritu behar dutela gaineratu du.

Jabi Arakamak (Geroa Bai) 2015etik aurrera bultzatutako politikak babestu ditu, eta, esan duenez, politika horiekin "euskararen normalizazioari eta sustapenari bultzada irmoa" eman zaio, "kontu handiz, elkarbizitza beti erdigunean mantentzeko, azken hamarkadetako euskararen aurkako politiken ostean". Bazkideen arteko desadostasunei dagokienez, "hitz egiten eta entzuten jarraitzearen" alde egin du, "akordio zabalak lortzeko".

Bakartxo Ruizek (EH Bildu) Navarra Suma eta PSN "inposaketaren mantra etengabe errepikatzen egotea" deitoratu du. Aurreko legegintzaldian "pauso batzuk" eman zirela azpimarratu du, baina "zonifikazioa gainditu ez izana" salatu du, eta "araudiaren inguruan eman ziren urrats bakanetan, gaur egungo errealitatea da euskara ezin dela meritu gisa ere baloratu".

Ainhoa Aznarezek (Podemos-Ahal Dugu) galdetu du "zergatik ari garen Nafarroan beti bi hizkuntzak aurrez aurre jartzen"; Galizian, Euskal Autonomia Erkidegoan edo Katalunian, berriz, "administrazio publikoan zein gobernuetan, beren bi hizkuntzak erabiltzen dituzte". Gainera, Navarra Suma alderdiko ordezkariari eskatu dio "begira dezala Iruñean 0-3 urte bitarteko eskoletan egiten ari den hizkuntza politika, dagoen eskaria eta bideratzen diren plazak".

Marisa de Simonek (Izquierda-Ezkerra) esan duenez, "euskarak elkarbizitzarako faktorea izan behar du, eta ez liskarrerako faktorea", eta "euskara nafarren kultur ondarearen parte gisa sustatzearen alde" egin du, "Nafarroan bizi garen pertsona guztiok euskara berezkotzat senti dezagun, hitz egin dezagun ala ez".