Mikel Irujo Nafarroako Gobernuko Industriako eta Enpresen Trantsizio Ekologiko eta Digitalerako kontseilariak adierazi du industria Foru Gobernuaren "lehentasun politikoa" dela, eta ziurtatu du sektorearen "argazki orokorra ona" dela.

Hala adierazi du ostegun honetan UPNk Gobernuaren kontrolerako osoko bilkuran industria arloari buruz egindako interpelazio batean. Irujok aitortu duenez, "albiste txar batzuk izan ditugu, baina argazkia osorik ikusi behar da. Urte onak izan ditugu inbertsioan eta enpleguan, ekosistema sendoa dugu, argazki orokorra ona da", berretsi du.

Nafarroan legegintzaldi honetan intereseko proiektu izendatu diren inbertsioak azpimarratu ditu Irujok, "430 milioi euroko inbertsioa eta 1.281 lanpostu sortuko direla aurreikusten baita". Volkswagen, Ingeteam, Hydro Extrusion Spain edo CINFA enpresetan aurreikusitako eta konprometitutako inbertsioak gehitu ditu.

Kontseilariak bereziki nabarmendu ditu "merkatu-nitxoetan" egindako inbertsioak, "250 milioi euro baino gehiago eta 300 lanpostu sortzea edo finkatzea" dakartenak. Era berean, nabarmendu du 2019az geroztik, inbertsio-deialdiek, merkataritza barne, "2.091 onuradun izan dituztela, 95 milioi euroko laguntzekin", eta "500 milioi euroko inbertsioa" mobilizatu dutela.

Mikel Irujok Nafarroako datu ekonomikoak balioetsi ditu; izan ere, 2012ko % 18ko zorra aurtengo % 12ra igaro da; 2015etik BPGren hazkundea "% 14,3koa" izan da, eta azken hamarkadan enpresen sorrera % 10 igo da, 35.324 izatetik 38.448izatera pasaz. Kontseilariak azpimarratu duenez, "zailtasunak dituzten enpresei laguntzen ari gara", eta UPNri egotzi dio arazoen aurrean "irtenbiderik ez proposatzea".

Ana Elizaldek (UPN) "konformista" izatea leporatu dio Nafarroako Gobernuari, industriak Nafarroan bizi duen egoeraren aurrean. Hala ere, kezkatuta agertu da "etengabeko datuen jarioagatik", sektorea "kantitatean eta kalitatean murrizten" ari dela erakusten dutelako. “Iristen direnak baino enpresa gehiago joaten dira, egoitza soziala aldatzeaz gain, eta horrek enpleguaren joerak markatzen ditu”, ohartarazi duenez.

Hala, Siemens-Gamesaren EEEak, Agoizko Flamasat proiektuak eta Sunsundeguiko Volvoren proiektua bertan behera uzteak "Nafarroako enpleguan izan duen eraginagatik” kezkatuta agertu da.

Javier Lecumberrik (PSN) Nafarroako ekonomiaren emaitza "positiboak" baloratu ditu; izan ere, "enplegua sortzeaz gain, duela hilabete gutxi 300.000 afiliatu baino gehiago ditugu Gizarte Segurantzan". Era berean, Nafarroako Gobernuaren ekintza azpimarratu du, "hazkunde ekonomikoaren testuinguru positiboa eta proaktiboa" sortzeagatik.

Laura Aznalek (EH Bildu) azpimarratu du digitalizazioak, adimen artifizialak eta "hiperglobalizazioak" eragindako "erronkei" aurre egin behar diela Nafarroako industriak, eta erronka horiek "ondo prestatuta eta kokatuta" egon behar dutela. Horregatik, "funtsezkoa da desagertuko diren lanak egiten dituzten langileak birkualifikatzea", "genero-arrakala" eta lan-istripuak jorratzea, eta etorkizuneko Industria Legeak "langileak erdigunean jartzea".

Mikel Asiainek (Geroa Bai) Elizalde kritikatu du bere hitzaldia Sunsundeguin oinarritzeagatik, enpresa horri "laguntzeko legearen aurka bozkatu zutenean". 2021-2025 Industria Planean ezarritako ekintzekin "jarraitzearen" alde egin du, "enpresa gehiagorengana iristeko, industria eraldatzen laguntzeko, Nafarroan multinazionalekin sinergiak ezartzeko" eta burokrazia "sinplifikatzeko".

Maribel García Malok (PPN) adierazi du industria "funtsezkoa dela gure garapenerako" eta Irujo gaitzetsi du "bere kudeaketa justifikatzen" saiatzeagatik eta duela hamar urteko datuak erabiltzeagatik. “Industriak datozen 60 urteetan motor ekonomikoa izateko behar duena enpresen lehiakortasuna hobetzeko eta sektore industrial berriak erakartzeko estrategia argia da".

Miguel Garridok (Contigo-Zurekin) Ana Elizalderi eskatu dio "proposamenen bat mahai gainean jartzeko, industriari edo komunitateari lagunduko diona, egiten ari dena egin beharrean”.

Emilio Jiménezek (Vox) kritikatu du Irujok ez duela neurririk hartu "gehiegizko fiskalitatea, enpresen deslokalizazioa, lokomozioaren sektoreko ziurgabetasuna eta berriztagarrien sektorearen" krisi larria saihesteko. “Ekimen politikorik eta baldintza egokirik ezak enplegua eta baliabide publikoak galtzea ekarri du", ondorioztatu du.