Parlamentuko Osoko Bilkurak ebazpen bat onetsi du Navarra Sumaren, PSNren eta Geroa Bairen aldeko botoekin eta EH Bilduren, Podemos-Ahal Duguren eta I-Eren aurkakoekin, zeinaren bidez Nafarroako Gobernua premiatzen baita “egin beharreko urratsak egin ditzan Sustapen Ministerioaren eta ADIFen bitartez Espainiako Gobernuarekin hitzarmen bat sinatzeko, helburu izanen duena AHTaren garapenean lankidetzan aritzea obrak azkartzeko, halako moduan non lehenbailehen kokatu ahal izanen baikara Interes Orokorreko Trenbide-sarean eta, horrenbestez, Mediterraneotik Kantauri itsasorainoko trenbide-korridorearen Nafarroako tartean, nazioarteko estandarrekin, nazioarteko zabaleradun bide bikoitzarekin eta bidaiari nahiz salgaietarako erabiliko dena”.

Onetsitako ebazpenak bigarren atalean Nafarroako Gobernua premiatzen du, kasu honetan aho batez, “Nafarroako hurbileko/aldirietako trenbide-sistema hobetzeko jarduketak egin ditzan, bai bide konbentzionala bai azpiegitura berriak erabiliz, trena erregio barneko distantzia ertaineko garraiobide gisa erabil dadin sustatzeko”.

Gainera, Gobernuari eskatzen zaio “Espainiako Gobernuarekin batera lan egin dezan, Aragoiko autonomia erkidegoan izapidetze administratiboa eta obren lizitazioa azkartzeko, jarraitutasuna eman ahal izan dakien Nafarroan egiten ari diren AHTaren obrei”.

Horrez gain, Nafarroako Gobernua premiatzen da “Espainiako Gobernuarekin lankidetzan aritu dadin AHTaren komunikaziorik onenaren eta azkarrenaren proiektua idazteko eta betetzeko, gure erkidegoan euskal Y-arekin lotzeko”.

Azkenik, Nafarroako Gobernuari eskatzen zaio “lehentasuna eman diezaien Foru Komunitateko trenbide-komunikazioak –aldirietakoak nahiz abiadura handikoak– sustatzeko, hobetzeko eta azkartzeko jarduketa guztiei”.

Zioen azalpenean, Navarra Suma talde parlamentarioak sustatutako ebazpenak adierazten du “ikusita etengabe pairatu diren premiagabeko erasoak, atzerapen justifikatugabeak, adostutako epeak bete ez direla, lankidetzarik eta akordiorik egon ez dela aurreko Nafarroako Gobernuak Abiadura Handiko Trena Nafarroan eraikitzeko lankidetza bat sinatzeko, oraingo gobernuak konpromiso argi eta irmoa har dezan, interes orokorreko trenbide-sareko azpiegitura bat delako”.

Ildo horretan, azpimarratzen da “AHT Espainiako Gobernuaren eskumena dela”, eta horregatik “garrantzitsua litzatekeela lankidetza eta elkarlana hobetuko lukeen hitzarmen bat sinatzea, behin funtzionamenduan egonik, enplegua sortuko duelako”.

Amaitzeko, azpimarratzen da “aldirietako nahiz hurbileko trenbide-komunikazioek pertsonen eta salgaien mugikortasuna hobetzen laguntzen dute; horrenbestez, Nafarroan bizi diren pertsonen bizi-kalitatea eta Nafarroan kokatuta dauden enpresen tokiko ekonomia hobetzen laguntzen dute. Hartara, beharrezkoa da Nafarroako Gobernua sarerik onena eta modernoena izateaz arduratu dadin”.

• www.parlamentodenavarra.es

• Mozioa (51. NPAO, 2019-12-17koa)