Parlamentuaren osoko bilkurak ebazpen bat onetsi du gaur aho batez, zeinaren bidez Nafarroako Gobernuko Osasun Departamentua premiatzen baita “besterik gabe bete ditzan Nafarroako gaixo kroniko eta pluripatologikoentzako Arreta Integratuko Estrategiaren baitan alboko esklerosi amiotrofikoa duten pertsonen arretarako dokumentuan jasotako prestazio eta konpromiso guztiak”.

Onetsitako ebazpenak bigarren atalean Foru Exekutiboari eskatzen dio “alboko esklerosi amiotrofikoaren diagnostikoa duten pertsonentzako errehabilitazio integral eta unibertsala berma dezan gehienez ere sei hilabeteko epean, % 100eko finantzaketa publikoarekin, gaixotasunaren prozesu osoan zehar, etxeko nahiz egoitzako errehabilitazio integralaren modalitateak barne”.

Horrez gain, Nafarroako Parlamentuak Nafarroako Gobernua premiatzen du “alboko esklerosi amiotrofikoaren diagnostikoa duten pertsona guztien mendekotasun- eta desgaitasun-mailaren berehalako balorazioa egiten dela berma dezan, eta maila horren berrikuspena egin dezan gehienez ere hiru hilabeteko epean”.

Era berean, Exekutiboari eskatzen zaio “berma dezan finantzaketa publikoa ematen dela teknika aurreratuko laguntzetarako, aireztapen egokiko sistema alternatiboetarako, garabi, ohe artikulatu, eskaren aurkako koltxoi, komuneko aulki beso-euskarridun eta komunikazio-gailu alternatibo eta handigarrietarako, begi-irakurgailuetarako edo alboko esklerosi amiotrofikoaren diagnostikoa duten pertsonen bizi-kalitatea errazteko bestelako premia batzuetarako, berariazko zirkuitu eta guzti alboko esklerosi amiotrofikoa duen inork ez dezan zailtasunik eduki laguntza horiek eskuratzeko gastuak itzultzeko atzerapenak direla-eta.  Neurri hori sei hilabetean bermatu beharko da”.

Bestalde, Nafarroako Gobernua premiatzen da “diru publikoarekin finantzatu ditzan, sei hilabeteko epean gehienez ere, alboko esklerosi amiotrofikoaren diagnostikoa duten pertsonentzako etxebizitzak eta ibilgailuak egokitzeko eta aldi baterako etxebizitza eta ibilgailu egokituak eskuratzeko laguntzak”. PSN eta Geroa Baik abstentzioa bozkatu dute atal honetan eta hurrengoan.

Gainera, Exekutiboari eskatzen zaio “plazak berma ditzan egoitza-zentroetan pertsona kaltetuak etxean egon ezin direnean, bermatuta langileak alboko esklerosi amiotrofikoaren diagnostikoa duten pertsonak zaintzeko prestakuntza eta eskarmentua dutenak direla”.

Bestetik, eta berriz ere aho batez, Nafarroako Gobernua premiatzen da zaintzaileei babesa eta prestakuntza-neurriak berma diezazkien”.

Nafarroako Gobernuari eskatzen zaio, bide batez, "aitor dezan Nafarroako Ospitale Unibertsitarioko Alboko Esklerosi Amiotrofikoaren diziplinaniztun unitateko profesionalek eginiko lana, bai eta ANELA-Alboko Esklerosi Amiotrofikoaren Nafarroako Elkartearena ere, eta Alboko Esklerosi Amiotrofikoa duten gaixoen nahiz haien familien arretan eta zainketan laguntzen duten pertsona guztiena".

Ildo berean, Nafarroako Gobernua premiatzen da "koordinazioa bultza dezan Nafarroako Ospitale Unibertsitarioko Alboko Esklerosi Amiotrofikoaren diziplinaniztun unitatearen eta ANELA-Alboko Esklerosi Amiotrofikoaren Nafarroako Elkartearen artean".

Navarra Suma ekimenaren titularraren eta PSNren, Geroa Bairen eta EH Bilduren eskariz, beste bi atal gehitu dira, lehenak Gobernua premiatzen du "inberti dezan tratamendu berriei buruzko ikerketan eta saiakuntza klinikoetan".

Bigarrenak, berriz, Gobernuari eskatzen dio "doitasunezko medikuntza pertsonalizatuaren programan jaso ditzan neuroendekapenezko gaixotasunak, ahalbidetzearren ahalik denbora laburrenean egitea prozesu diagnostikoa eta taxutzea gaixo bakoitzarentzako tratamendurik aproposenerako plana".

Zioen azalpenean, Navarra Suma talde parlamentarioak bultzatutako ebazpenak Alboko Esklerosi Amiotrofikoari (ELA) lotutako inpaktu sanitario, sozial eta ekonomiko handiaren berri ematen du. Gaixotasun hori garuneko eta bizkarrezur-muineko neurona motorren endekapenezko gaixotasun bat da, eta 45-65 urteko pertsonengan du eragina bereziki, zaintza eta laguntza teknikoak behar ditu, bai eta etxebizitza egokitzeko ere, eta horrek kostu ekonomiko handia dakarkie erasandako pertsonei eta haien familiei.

Horregatik, “diagnostiko zaileko” gaixotasun horren izaera kronikoa kontuan hartuta, eta bost urtetik beherako biziraupen tasarekin, 2018ko kronikoen estrategian jasotako neurriak bete daitezen eskatzen da; izan ere, ELA duten pertsonen arreta hobetzea dakarte, baina “gaur egun ez daude bermatuta”.

• www.nafarroakoparlamentua.eus
• Mozioa (138. NPAO, 2021-12-01ekoa)