Carmen Maeztu Nafarroako Gobernuko Eskubide Sozialetako, Gizarte Ekonomiako eta Enpleguko kontseilariak azaldu duenez, "Foru Gobernua elkarrizketa sakona izaten ari da gizarte eta toki entitateekin, erakundeen eta departamentuen artean hausnarketa prozesu bat bultzatzeko helburuarekin, Nafarroan etxerik gabeko pertsonentzako zerbitzuak berrantolatzeko bide-orri bat egin ahal izateko".

Elkarrizketa horren helburua, zehaztu duenez, "beste dispositibo batzuk sortzea beharrezkoa den identifikatzea da, baita etxerik gabeko pertsonen arretan esku hartzen duten erakundeen erantzukizunak eta konpromisoak zehaztea ere".

Gobernuaren kontroleko Osoko Bilkuran Voxek egindako interpelazio bati erantzunez, Carmen Maeztuk esan du erantzuna "integrala" izan behar dela, "erantzukizuna duten subjektu guztiekin koordinatua, etxebizitza duina izateko eskubidea bermatzeko eta, batez ere, Nafarroan bizi diren pertsona guztiak gizarteratzeko".

Hala, kontseilariak azaldu duenez, "azarotik ari gara lanean Gizarte Babeseko eta Garapenerako Lankidetzako Zuzendaritza Nagusiko arduradunekn, Etxebizitzako, Migrazio Politiketako eta Osasun Departamentuko ordezkariekin, Altsasuko, Iruñeko eta Tuterako aterpetxeetako eta udal horietako gizarte-zerbitzuetako arloetako arduradunekin, eta Gurutze Gorriko, Caritaseko eta Pobreziaren eta Gizarte Bazterketaren aurkako Borrokarako Sareko ordezkariekin".

Carmen Maeztuk adierazi duenez, "lantalde honen helburuak etxegabetasunaren egoerari buruzko diagnostiko bateratu bat egitea eta hura prebenitzeko eta jorratzeko dauden baliabideak egokitzea izan dira, baita erakunde publikoen jarduna babestu behar duen esparru kontzeptual bat ezartzea ere".

Kontseilariak defendatu duenez, arlo horretan "esku-hartzea hobetzeko orientabideak planteatu behar dira, eta epe laburrean eta ertainean ekintza zehatzak proposatu, Nafarroan etxerik gabeko pertsonen arreta hobetzeko lehentasunezkotzat jotzen direnak".

"Orain arte diagnostikoan egin dugu aurrera, eta datu kuantitatiboekin batera, gure erkidegoan etxerik gabe egon daitezkeen pertsonen profilari eta kopuruari buruz Nafarroan lan egiten duten entitateen eta profesionalen iritzia ere jaso da", azaldu du Maeztuk.

Kontseilariak gaineratu duenez, laster dokumentu bat aurkeztuko dute, "adostua, parte hartze prozesu baten emaitza dena eta landua, beharrezkotzat jotzen ditugun gaiak eta baliabide osagarriak definituko dituena, eta etxerik gabeko pertsonei arreta emateko sarea osatzera etorriko direnak, ikuspegi integral batetik".

Iruñeko Udalak hiritik alde egin nahi duten etxerik gabeko pertsonei autobus-txartelak doan eskaintzeko hartu duen erabakiari Voxek egindako kritiken harira, Maeztuk esan du "udal askok duela urte askotatik etxerik gabeko pertsonei autobus txartelak ordaintzeko baliabideak ematen" dizkietela. "Hau ez da gauza berria, beti egin izan da. Eta hori egiten dute autonomia erkidego guztiek eta etxerik gabeko pertsonei arreta emateko politikak dituzten tokiko erakunde guztiek", berretsi du.

Emilio Jiménezek (Vox) adierazi duenez, "etxerik gabeko pertsona gehien dituen hirugarren erkidegoa da Nafarroa", eta "drama bat da ate irekien politika, dei efektua, Nafarroara etortzea, Espainiara etortzea, dirua emango zaizue eta inor ez da atzean geratuko".

"Sirena kantuak besterik ez dira. Etortzen direnean, mafiek eta politika globalistek engainatuta, hau agindutako lurra ez dela egiaztatzen dute", gaitzetsi du Jimenezek. Gainera, Iruñeko Udalaren "neurri zitala" kritikatu du, hiritik alde egin nahi duten etxerik gabeko pertsonei "autobuseko txartelak doan" eskaintzen dizkielako. "Itxaropena inora joateko txartela lortzea da", amaitu du.

Raquel Garbayok (UPN) kritikatu du, hainbat gizarte erakundek ohartarazi dutenez, "etxerik gabeko pertsonen kopuruak gora egin duela azkenaldian, eta gizarte zerbitzu publikoak ez dira iristen. Zure gizarte-politikak porrot egiten ari dira. Gero eta pobreagoak gara, hilabete amaierara iristeko gero eta arazo gehiago ditugu, erosketa-saskia oinarrizko elikagai edo produktuekin betetzeko arazo gehiago ditugu, baita etxebizitza edo gela duin bat izateko ere. Hauek dira zure politika sozialak", zehaztu du.

Olga Chuecak (PSN) esan du Voxi "gutxien axola zaiona etxerik gabeko pertsonen errealitatea" dela.

EH Bildu, Geroa Bai eta Contigo-Zurekin taldeek ez dute hitza hartu nahi izan.

Maribel García Malok (PPN) aitortu duenez, "oso kezkatuta dago Nafarroa etxerik gabeko pertsonen kopuruan izaten ari den hazkunde nabarmenarekin. 2012tik % 83 igo da, Nastaten arabera. Etxerik gabeko pertsonen kopurua batez bestekoa baino askoz handiagoa da. Gizarte-erakundeek egoera horretaz ohartarazten dute. Nafarroako Gobernua oso berandu dabil egoera horri heltzeko", adierazi du.