Migrazio Politiketako eta Justiziako Batzordeak ebazpen bat onetsi du gaur Navarra Sumaren, PSNren eta I-Eren aldeko botoekin eta Geroa Bairen, EH Bilduren eta Podemos-Ahal Duguren abstentzioarekin, zeinaren bidez Espainiako Gobernua premiatzen baita “ase ditzan Nafarroako Justizia Auzitegi Nagusiak planteatutako premia nagusiak, Foru Komunitateko herritar guztientzako justizia arinagoa eta eraginkorragoa lortzeko”.

Onetsitako ebazpenak bigarren atalean Foru Gobernuari eskatzen dio, “bizi dugun egoera ekonomiko korapilatsua aitortu arren, Justiziaren arloan aurrekontu-ahalegina egin dezan, gure erkidegoa 2022an hurbildu dadin beste autonomia-erkidego batzuek arlo horretara bideratzen duten ehunekora”. Navarra Sumak eta I-Ek alde bozkatu dute eta PSNk, Geroa Baik, EH Bilduk eta Podemos-Ahal Duguk abstentzioa.

Zioen azalpenean, Navarra Suma talde parlamentarioak sustatutako ebazpenak Nafarroako Justizia Auzitegi Nagusiaren Gobernu Salak Botere Judizialaren Kontseilu Nagusiari jakinarazitakoak gogorarazten ditu, besteak beste, Justizia Administrazioaren eraginkortasuna lortzeko “epaile-kopuru egokia eta diseinu organiko egokia” eskatzeko, une honetan lan-arloan, merkataritza-arloan, lurralde atxikipenarenean edo apelazioen arloan premien azpitik baitaude.

Foru-administrazioaren eskumena diren eskari horiei beste batzuk gehitu behar zaizkie, “Foru Gobernuaren borondate politikoaren menpe” daudenak. Gobernuari “anbizio eskasa” izatea egozten dio, are gehiago “departamentu berri bat sortu ondoren, zeinak, hala ere, ez baitu lortu justizia hobetzea lehenestea”, izan ere, “jaitsi egin da justiziarako aurreikusitako aurrekontua aurreko ekitaldian esleitutako kopuruarekiko”.

Ebazpena sustatu duen taldeak zerbitzu eta/edo baliabideei dagokienez eskakizun hauek bete daitezen planteatzen du: 7.000 biztanletik gorako bake-epaitegiei eta bake-epaitegien idazkaritzen elkarteei baliabide informatikoak ematea; bitarteko langileei prestakuntza ematea Avantius kudeaketa prozesaleko sistemarekin lotutako gaietan; Justizia Administrazioko legelariei ordenagailu eramangarriak ematea, telelana egin ahal dezaten; edo Justizia Jauregia handitzea, etorkizun hurbilean zerbitzu edo organo berriak abian jarri ahal izateko gai izan dadin.

Nuria Medina (PSN) buru izan duen saioan parte hartu dute Jorge Esparza, Alberto Bonilla, Cristina Ibarrola, Ángel Ansa, Raquel Garbayo, Maribel García-Malo (Navarra Suma), Virginia Magdaleno, Patricia Fanlo (PSN), Blanca Regúlez, Isabel Aramburu (Geroa Bai), Arantxa Izurdiaga, Patricia Perales (EH Bildu), Ainhoa Aznárez (Podemos-Ahal Dugu) eta Marisa de Simón (I-E) parlamentariek.

• www.nafarroakoparlamentua.eus

• Mozioa (12. NPAO, 2021-02-02koa)