Unai Hualde Nafarroako Parlamentuko lehendakariak Anfas desgaitasun intelektuala edo garapenaren nahastea duten pertsonen eta beren familien alde lan egiten duen elkarteko lehendakari Javier Goldárazi harrera egin dio gaur. 6 urteko agintaldiari amaiera emanen dio Goldárazek datorren ekainaren 2an elkarteak ospatuko duen Batzar orokorrean.

Bileran zehar, Javier Goldárazek eskerrak eman dizkio presidenteari “beti agertu duen prestasunagatik, erakutsitako interes pertsonalagatik eta azken urteotan egindako lanagatik”, baita Parlamentuko ateak beti irekita izateagatik ere. “Gure desberdintasunekin, baina gure topaketak beti izan dira aberasgarriak eta pertsonalki eskerrak eman nahi nizkizun kargua utzi baino lehen”.

Unai Hualde Legebiltzarreko presidenteak, bere aldetik, “zorte ona” opa dio Javier Goldarazi orain hasiko duen bizi-etapa berrian, eta eskerrak eman dizkio urte hauetan guztietan egindako lanagatik eta egindako ahaleginagatik. Hualderen hitzetan, “zortea izan dut Javierren konpromisoaren eta inplikazioaren lekuko izateagatik. Izan ere, harekin bat egin dut tokiko esparruan eta orain Parlamentuan, desgaitasunen bat duten pertsonek eta haien familiek gure erkidegoan dituzten arazoak konpontzeko. Ziur nago aurrerantzean ere hala jarraituko duela, nahiz eta leku diskretuago batetik”.

Anfas adimen-urritasuna edo garapenaren nahastea duten pertsonen eta haien familien aldeko Nafarroako Elkarteak 60 urteko ibilbidea bete berri du, 1961ean sortu baitzen, eta adimen-urritasuna duten 1.300 pertsona baino gehiago artatzen ditu Nafarroa osoko 7 ordezkaritzetan, 139 langilerekin; 650 boluntario mobilizatzen ditu, eta 30 programa edo zerbitzu ematen ditu.