Parlamentuaren Osoko Bilkurak baliozkotu du gaur, Navarra Sumaren, PSNren, Geroa Bairen eta Podemos-Ahal Duguren aldeko botoekin, EH Bilduren abstentzioarekin eta I-Eren aurkako botoarekin, 5/2021 Foru Lege-dekretua, ekainaren 2koa, zerga arloko zenbait neurri onesten dituena koronabirusaren (COVID-19) osasun krisiak eragindako inpaktuari aurre egiteko.

Martxoaren 18ko 1/2020 Foru Lege-dekretuaren, martxoaren 25eko 2/2020 Foru Lege-dekretuaren eta uztailaren 22ko 7/2020 Foru Lege-dekretuaren kasuan ez bezala (lehen biak martxoaren 27an baliozkotuak eta apirilaren 3an foru lege bihurtuak, eta hirugarrena uztailaren 30ean baliozkotua eta Foru Lege gaur bihurtua), 5/2021 Foru Lege-dekretua ez da foru lege proiektu gisa izapidetuko presako prozeduraren bidez, 3/2020, 4/2020, 5/2020, 6/2020, 8/2020, 9/2020¸ 1/2021, 3/2021 eta 4/2021 foru lege-dekretuekin gertatu bezala. Ezein taldek ez du hori eskatu.

5/2021 Foru Lege-dekretuaren helburua da beharrezko xedapenak ezartzea COVID-19ren pandemia geldiarazteko hartutako neurri murriztaileek kaltetutako zenbait jarduera ekonomikok duten egoera zaila arintzea.

Neurri berrien onuradunen artean aurkitzen dira, besteak beste, turismoa eta ostalaritza, gaueko aisialdia, aurreko jarduerekin lotutako handizkako merkataritza eta biltzarrak eta batzarrak antolatzeko zerbitzua; horientzat aparteko laguntza deialdia onartu zuen Nafarroako Gobernuak pasa den martxoan. Foru Lege Dekretu horren arabera, deialdi hartan emandako laguntzak salbuetsita egongo dira Pertsona Fisikoen Errentaren gaineko Zergatik eta Sozietateen gaineko Zergatik.

Gainera, Foru Lege Dekretuan jasotzen den beste ekimen bat, hori ere zerga-arlokoa, jokoaren sektorearen ingurukoa da, bingo eta joko-aretoei dagokienean, itxita eta jarduera etenda egon baitira, edo taberna eta jatetxeen barrualdean egoten diren “B motako” makinei edo jolas-makina saridunei dagokienean, horiek ere bezeroek ezin izan baitituzte erabili barrualdean zerbitzua eman ezin zenean edo mugatuta zegoenean.

Sektorean murrizketen efektua murrizteko helburuarekin, ‘B motako” makinak edo sariak ematen dituzten jolas-makinak ustiatzeagatik ordaintzen den jokoaren gaineko zergaren kuota %50 murriztuko da aurtengo bigarren, hirugarren eta laugarren hiruhilekoan.

Azkenik, Foru Lege Dekretuan, halaber, kontuan hartu da pandemia Nafarroako kirol- federazio ezberdinek aurreikusitako kirol-proiektuen garapenean izaten ari den eragina, programaturiko jarduera asko ezin izan baitira egin edo laburragoak izan dira, onartutako murrizketen ondorioz. Egoera hori medio, diru-sarrerak asko murriztu dira Nafarroako kirol-federazioen kasuan, eta horrek haien funtzionamendua eta helburuak kaltetzen amaitu dezake.

Iaz, Kultura eta Kirol Departamentuak diru-laguntzen deialdi bat onartu zuen Nafarroako kirol-federazioentzat, haien ohiko funtzionamendua sustatzeko, Nafarroa mailako lehiaketa ofizialak egitea eta estatuko lehiaketetan parte hartzea errazteko eta Foru Komunitatean kirol-jarduera federatua hedatzen saiatzeko asmoarekin.

Pandemiaren ondorioz ezarritako murrizketengatik emandako diru-laguntzen zati bat jaso ezinak kalte ekonomiko nabaria eragingo luke, federazio horien bideragarritasuna arriskuan jartzearekin batera.

Beraz, diru-laguntzen deialdiak kirol-federazioei laguntzeko helburua bete ahal izateko, beharrezkoa da oinarri arautzaileak aldatzeko aukera ezartzea, emandako zenbatekoak aldatu gabe, federazioek zenbateko horiek oso-osorik jaso ahal izatea bermatzearren.

5/2021 Foru Lege-dekretua, ekainaren 2koa, zerga arloko zenbait neurri onesten dituena koronabirusaren (COVID-19) osasun krisiak eragindako inpaktuari aurre egiteko, NAOn argitaratu eta hurrengo egunean sartuko da indarrean.

• www.nafarroakoparlamentua.eus

• Foru Lege-dekretua (80. NPAO, 2021-06-15ekoa)