Legebiltzarreko Osoko Bilkurak, UPN, PSN, EH Bildu, Geroa Bai, PPN eta Contigo-Zurekin taldeen aldeko botoekin eta Vox Nafarroaren aurkako botoarekin, foru lege bat onetsi du gaur, 358.282 euroko aparteko kreditua ematekoa Nafarroako Gobernuko departamentu batzuen beharrak finantzatzeko –Lehendakaritza eta Berdintasun Departamentua, Lurralde Kohesiokoa, Industriako eta Enpresen Trantsizio Ekologiko eta Digitalekoa, Eskubide Sozialetakoa, Ekonomia Sozialeko eta Enplegukoa eta Kultura, Kirol eta Turismokoa.

Lehendakaritza eta Berdintasun Departamentuaren beharrizanak finantzatzeko aparteko kreditua Iruñeko Udalarekiko hitzarmena, sarean ikuspegi dialogikoz lan egitekoa aurrekontu-partidari aplikatuko zaio (123.282) eta Toki erakundeekiko hitzarmenak, sarean ikuspegi dialogikoz lan egitekoak izeneko partidan dagoen kredituaren kargura finantzatuko da (123.282).

Lurralde Kohesiorako Departamentuaren kasuan, aparteko kreditua Erronkari, Otsagabia, Garralda, Auritz, Erro, Aurizberri eta Luzaideko toki-entitateentzako transferentzia aurrekontu-partidari aplikatuko zaio (120.000) eta PIRIBIZI dirulaguntzak: Pirinioetan erronka demografikoari aurre egitea izeneko partidan dagoen kredituaren kargura finantzatuko da (120.000).

Industriako eta Enpresen Trantsizio Ekologiko eta Digitalerako Departamentuaren beharrizanak finantzatzeko aparteko kreditua Anizko energia-komunitatearentzako dirulaguntza (30.000) eta Arbeitzako Kontzejuarentzako dirulaguntza, energia-komunitateak sustatzekoa (7.000) aurrekontu-partidei aplikatuko zaie. Biak finantzatuko dira Baztanen, Anizko herriarentzako dirulaguntza, energia-trantsizioko proiektu baterakoa eta Arbeitzako Kontzejuarentzako dirulaguntza, energia-komunitate bat sortzekoa partidetan dagoen kreditu erabilgarriaren kargura (30.000 eta 7.000, hurrenez hurren).

Eskubide Sozialetako, Ekonomia Sozialeko eta Enpleguko Departamentuan, aparteko kreditua Hitzarmena, erabateko inklusioarekin, “Inklusiorako eraldaketa digitala Nafarroan” proiekturakoa izeneko aurrekontu-partidari aplikatuko zaio (38.000) eta izen bereko partidan dagoen kreditu erabilgarriaren kargura finantzatuko da (38.000).

Azkenik, Kultura, Kirol eta Turismo Departamentuan, aparteko kreditua Uharteko Udalarentzako transferentzia: entrenatzeko futbol zelaia egitea aurrekontu-partidari aplikatuko zaio (40.000) eta Uharteko Udalarentzako transferentzia: futbol 8ko zelaian soropil artifiziala jartzea partidan dagoen kreditu erabilgarriaren kargura finantzatuko da (40.000).

Nafarroako Ogasun Publikoari buruzko apirilaren 4ko 13/2007 Foru Legearen 4. artikuluak ezartzen du foru legez arautu behar direla Nafarroako aurrekontu orokorrak, bai eta haietan egindako aldaketak ere, kreditu bereziak edo kreditu-gehigarriak emateari buruzkoak badira. Beraz, gastu-aurrekontuan esleitutako kreditu nahikorik ez dagoenez eta 48. artikuluari jarraikiz, bidezkoa da legea onestea, kasu honetan irakurketa bakarrean.

Lege honek Nafarroako Aldizkari Ofizialean argitaratu eta biharamunean hartuko du indarra.

• https://parlamentodenavarra.es/eu
• Foru-lege proiektua (104. NPAO, 2024-09-17koa)