Nafarroako Parlamentuak gaur onetsi du, PSN, Geroa Bai, Podemos-Ahal Dugu eta I-Eren aldeko botoekin eta EH Bilduren abstentzioarekin 2022ko ekitaldirako Nafarroako Aurrekontu Orokorrei buruzko Foru Legea. 5.273.126.597 euroko kredituak bildu dira, horietatik 4.767.034.210 euro gastu ez-finantzarioari dagozkio eta 506.092.387 euro gastu finantzariori (zorraren amortizazioa eta interesen ordainketa). Navarra Sumak aurkako botoa eman du.

 

Legearen 1. artikuluan jasorik dagoenez, 2022ko ekitaldirako Nafarroako Aurrekontu Orokorrek, zeinetan 5.273.126.597 euroko kredituak bildu diren, atal hauek dituzte: Parlamentuaren, Kontuen Ganberaren eta Arartekoaren aurrekontuak; Foru Komunitateko Administrazioaren eta haren erakunde autonomoen aurrekontua; Nafarroako Kontseiluaren aurrekontua; Foru Komunitateko fundazio publikoen aurrekontuak; eta Foru Komunitateko sozietate publikoen aurrekontuak.

 

Bigarren artikuluan ageri denez, 4.767.034.210 eurokoa da gastu ez-finantzarioaren muga, 2021ekoarekin alderatuz % 6,23 gehiago. Nafarroako Ogasun Publikoari buruzko apirilaren 4ko 13/2007 Foru Legearen 34. artikuluan dago araututa muga hori. 2021erako aurrekontuarekin alderatuz, desberdintasuna 286 milioi eurokoa da, eta horietatik 162 europar funtsetatik eratorriak dira.

 

Aurrekontu-egonkortasunaren arloko helburuak betetze aldera, eta Aurrekontu Egonkortasunari eta Finantza Iraunkortasunari buruzko apirilaren 27ko 2/2012 Lege Organikoaren 30. artikuluan ezarritakoarekin bat, 3.922.275.084 euroko muga ezarri zaio gastu ez-finantzarioari, behin Toki Ogasunen Funtsa deskontatuta.

 

Hirugarren artikuluan ezarritakoaren arabera, Nafarroako Ogasun Publikoari buruzko apirilaren 4ko 13/2007 Foru Legearen aginduen araberakoak izanen dira aurrekontu-kredituen aldaketak, onetsitako foru legeak agindu horiek aldatzen ez dituen heinean.

 

Hala ere, ez dira aurrekontu-aldaketatzat hartuko partiden arteko funts mugimenduak, baldin eta, partida horietan agertzen diren kredituek helburu bera izanik, partida ezberdinetan kokatuta badaude Europar Batasunak gastuen erabilera hobeto kontrolatze aldera halaxe exijitzeagatik, gastuak hein batean hark kofinantzatuak izatearen ondorioz.

 

Europar Batasuneko programen aurrekontu-aldaketei dagokienez (4. artikulua), Nafarroako Gobernuak, Ekonomia eta Ogasuneko kontseilariak proposaturik, eta Politika Ekonomiko eta Enpresarialaren eta Lanaren zuzendari nagusiak txostena egin ondoren, aurrekontuetan behar diren aldaketak egiteko baimena eman ahal du, EBk kofinantzatutako programa eta proiektuak ekitaldian zehar ahalik eta hobekien betetzeko, Europako Batzordeak hasierako dokumentuan onetsitakoari edo ondoren jarraipen batzordeek edo Batzordeak berak eginiko aldaketei jarraituz. Aurrekontu-aldaketak gastuen egoera-orrietan agertzen diren edozein motatako kredituen bidez finantzatu beharko dira.

 

Gaur Osoko Bilkuran onetsitako 8 in voce zuzenketak jasotzen ditu legeak, aldez aurretik abenduaren 13 eta 17 bitartean Ekonomia eta Ogasuneko Batzordean eztabaidatu (831 zuzenketa eztabaidatu ziren, horietatik 148 in voce) eta irizpenean jaso diren 359 zuzenketei gehituz (horiek guztiak PSN, Geroa Bai, EH Bildu, Podemos-Ahal Dugu eta I-Ek konbinazio desberdinetan aurkeztuak). Onetsitako zuzenketen balioa, gaurkoak gehituz (216.666 euro), 19.372.024 eurokoa da.

 

Osoko bilkurako eztabaidan beraz Navarra Sumak mantendutako 371 zuzenketa eztabaidatu dira, gehi aurkeztutako 9 in voce zuzenketak (Navarra Sumak aurkeztu diren 15 ez ditu izapidetzeko onartu, eta EH Bilduk bat erretiratu du), horiek guztiak, Navarra Sumak aurkeztutako bat izan ezik, PSNk, Geroa Baik, EH Bilduk, Podemos-Ahal Duguk eta I-Ek konbinazio desberdinetan sinatuak.

 

Osoko bilkuran eztabaidatu diren in voce zuzenketak honakoak dira:

 

Lurralde Kohesiorako Batzordea

 

- In voce zuzenketa, gastuei 60.000 euro gehitzekoa, Transferentzia S. M. Unxeko Udalari. Jendegabetzearen aurkako eta biziberritze sozialaren aldeko Partaidetzazko Plan Estrategikoaren proiektu pilotua izeneko partida berrirako. Helburua da “jendegabetzearen aurkako borrokarako eta biziberritze sozialerako partaidetzazko plan estrategiko bat garatzea, beste udalerri batzuentzat eredu izan daitekeena”. Lurralde Kohesiorako Departamentuaren Toki entitateentzako konpentsazioa toki tributuetako hobariengatik partidaren kargura finantzatuko da. PSN, Geroa Bai eta Podemos-Ahal Duguk aurkeztu dute. Aho batez onetsi da. 

 

- In voce zuzenketa, gastuei 22.000 euro gehitzekoa, PA-30 ingurubideko gurutzagunea biribilgune itxi bihurtzea izeneko partida berrirako. Helburua da “trafikoaren segurtasun eta banaketa baldintzen hobekuntza lortzea”. Ekonomia eta Ogasun Departamentuaren Kontingentzia Funtsa partidaren kargura finantzatuko da. PSN, Geroa Bai, EH Bildu, Podemos-Ahal Dugu eta Izquierda-Ezkerrak aurkeztu dute. Aho batez onetsi da. 

 

Osasun Batzordea

 

- In voce zuzenketa, gastuei 10.000 euro gehitzekoa, COVID-19 iraunkorraren Nafarroako erregistroa eta COVID-19 iraunkorraren ikerketarekin lotutako beste proiektu batzuk izeneko partida berrirako. Helburua da “Miguel Servet Fundazioaren bidez ikerketa biomedikoari bultzada emateko aurrekontua handitzea”. Ekonomia eta Ogasun Departamentuaren Kontingentzia Funtsa partidaren kargura finantzatuko da. PSN eta Podemos-Ahal Duguk aurkeztu dute. Aho batez onetsi da. 

 

- In voce zuzenketa, gastuei 500.000 euro gehitzekoa, Larraingoa Komunitate Terapeutikoa izeneko partida berrirako. Helburua da “artapenaren kalitate eta segurtasun baldintzak bermatzea, egungo instalazioak hobetzeko egokitze obrak eginez, horrela plaza kopurua handitu ahal izan dezaten, Nafarroako Gobernuak eskatu bezala, egungo itxarote zerrendari erantzuteko”. Ekonomia eta Ogasun Departamentuaren Kontingentzia Funtsa partidaren kargura finantzatuko da. Navarra Sumak aurkeztu du. Baztertu egin da, PSN, Geroa Bai, EH Bildu, Podemos-Ahal Dugu eta Izquierda-Ezkerraren aurkako botoekin eta Navarra Sumaren aldeko botoarekin. 

 

Garapen Ekonomiko eta Enpresarialeko Batzordea

 

- In voce zuzenketa, gastuetako partida bati izena aldatzekoa: Berrikuntza Digitaleko Poloa partida aurrerantzean Dirulaguntza NUPi. Eraikin bat egokitu eta ekipamenduz hornitzea Berrikuntza Digitaleko Poloaren egoitza izateko deituko da. Helburua da “Sarioko eraikina egokitzea Poloaren instalazioak Unibertsitateko campusean kokatzeko”. PSN, Geroa Bai, EH Bildu, Podemos-Ahal Dugu eta Izquierda-Ezkerrak aurkeztu dute. PSN, Geroa Bai, EH Bildu, Podemos-Ahal Dugu eta I-Eren aldeko botoekin eta Navarra Sumaren abstentzioarekin onetsi da. 18

 

Eskubide Sozialetako Batzordea

 

- In voce zuzenketa, gastuei 81.000 euro gehitzekoa, Hitzarmena Barañaingo Udalarekin. Etxeko laguntzaren proiektu pilotua izeneko partida berrirako. Helburua da “etxeko laguntza zerbitzua hobetzea”. Ekonomia eta Ogasun Departamentuaren Kontingentzia Funtsa partidaren kargura finantzatuko da. PSNk aurkeztu du. Aho batez onetsi da. 

 

- In voce zuzenketa, Laguntza teknikoa. Bizitzeko gutxieneko diru-sarrera – Errenta bermatua izeneko gastu partida ezabatzekoa, “helburu bererako beste zenbait partida sortu eta euro bat baino ez delako gelditu honako finantzaketa-partida honetan”. PSN, Geroa Bai eta Podemos-Ahal Duguk aurkeztu dute. Aho batez onetsi da.

 

Kultura eta Kiroleko Batzordea

 

- In voce zuzenketa, gastuei 28.666 euro gehitzekoa, Hitzarmena El Empedrao elkartearekin. Arte iragankorreko Desadarve 2022 lehiaketa izeneko partida berrirako. Helburua da “elkartearen izena zuzentzea”. Ekonomia eta Ogasun Departamentuaren Kontingentzia Funtsa partidaren kargura finantzatuko da. Podemos-Ahal Dugu eta Izquierda-Ezkerrak aurkeztu dute. Aho batez onetsi da. 

 

Migrazio Politiketako eta Justiziako Batzordea

 

- In voce zuzenketa, gastuei 15.000 euro gehitzekoa, Hitzarmena Kairaba Elkartearekin, kulturen arteko bizikidetzarako DENTAL programaren esparruan izeneko partida berrirako. Helburua da “finantzatu beharreko programa gehiago zehaztu eta partida hobeki gauzatzea”. Ekonomia eta Ogasun Departamentuaren Kontingentzia Funtsa partidaren kargura finantzatuko da.  PSN, Geroa Bai, EH Bildu eta Podemos-Ahal Duguk aurkeztu dute. PSN, Geroa Bai, EH Bildu, Podemos-Ahal Dugu eta Izquierda-Ezkerraren aldeko botoekin eta Navarra Sumaren abstentzioarekin onetsi da. 

 

Eztabaida amaitu denean, 2022ko ekitaldirako Nafarroako Aurrekontu Orokorren Foru Lege proiektuaren behin betiko bozketa egin da.

 

 

• www.parlamentodenavarra.es
• Foru Lege proiektua (127. NPAO, 2021-11-09koa)
• Zuzenketak (133. NPAO, 2021-11-22koa)
• Zuzenketak (141. NPAO, 2021-12-10ekoa)
• Irizpena (148. NPAO, 2021-12-23koa)