Geroa Bai, EH Bildu, Podemos-Ahal Dugu, PSN eta I-Eren aldeko botoekin eta UPN eta PPNren aurkako botoekin gaurko Osoko Bilkuran onetsi duen erabaki batean, Parlamentuak Nafarroako Gobernua premiatzen du “legegintzaren eta antolamenduaren arloetan daukan autonomia balia dezan, LOMCE Nafarroan aplikatzeak irakaskuntza publikorako, ikasleentzat, irakasleentzat eta familientzat dakartzan ondorio negatiboak minimizatzeko”.

Onetsitako erabakiaren bigarren puntuan hau eskatzen zaio Foru Gobernuari: “Unibertsitatez kanpoko irakaskuntzako mailetako curriculumaren dekretuak eta eskola-antolaketari, lanaldiari, ordutegiari eta ebaluazioari buruzko araudia alda ditzan, Nafarroako hezkuntza sistema laikoagoa, ulerkorragoa, malguagoa eta irekiagoa lortze aldera”.

Horretarako, helburutzat hartuko litzateke “guztien eskola-arrakastari laguntzea, ikasleen interesak eta gaitasunak errespetatuta eta bultzatuta; eta ikastetxeek hezkuntza-ekintza beren gizarte eta hezkuntza arloko testuingurua egokitzeko orduan duten autonomia hobetzea”.

Bestalde, hirugarren atalean Nafarroako Gobernua premiatzen da “LOMCEren aplikazioaren eta inbertsioa murriztu duten foru eta estatu politiken ondorioz irakaskuntza publikoan egon diren murrizketei amaiera eman eta lehengora itzultzen aurrera egin dezan, ordezkari sindikalekin negoziazio prozesu bat zabalduz Nafarroako irakaskuntza publikoaren kalitatea hobetzeko Itun berri baten testuinguruan”.

Izquierda-Ezkerrako foru parlamentarien elkarteak sustatutako erabakiaren zioen azalpenean salatzen da nola LOMCE aplikatzen hasi zenetik irakaskuntza sistema publikoak balioa galdu duen, sozioekonomikoki indartsuen diren sektoreen mesedetan. Hori dela eta, “etorkizuneko gizarte bidezkoago eta kohesionatuago baten eratzeak berekin dakarren interes orokorra” babesteko deia egiten da, eta horrek hezkuntzaren pribatizazioarekin batere zerikusirik ez duela eransten da.

Ildo beretik proposatzaileak baieztatzen duenez, LOMCEren arabera hezkuntza ez da “eskubide sozial unibertsal bat, ondasun partikularra eta etorkizuneko banakako inbertsioa baizik; ikastetxea askatasunez aukeratzeko eskubidearen eufemismoaren pean, ikasleen sailkapena eta bereizketa bultzatzen ditu”, argi eta garbi “gizarte sektorizatu eta estratifikatuko ereduarekin bat datozen irizpide klasisten arabera”. 

• www.nafarroakoparlamentua.eus
• Mozioa (106. NPAO, 2016-09-16koa)