Parlamentuko Osoko Bilkurak ebazpen bat aho batez onetsi du gaur, zeinaren bidez Nafarroako Gobernua premiatzen den “Nafarroan lehenbailehen aplika eta arautu dezan Errepide bidezko osasun-garraioko ibilgailuek eduki beharreko ezaugarri teknikoak, osasun-ekipamendua eta langile-hornidura ezartzen dituen 836/2012 Errege Dekretuan xedaturikoa”.

Onetsitako ebazpenak bigarren idatz-zati du non, halaber, Nafarroako Gobernua premiatzen den “836/2012 Errege Dekretuan ezarritako baldintzak, prozedurak eta hezkuntza-bitartekoak ezar ditzan, laguntza-anbulantzien gidarientzat eta laguntzaileentzat betekizun diren akreditazioak eta habilitazioak lortzeko”.

Era berean eta hirugarren idatz-zati batean, Nafarroako Gobernua premiatzen da “Nafarroan bizi diren osasun-garraioko teknikarien erregistro bat egin dezan”.

Halaber, Nafarroako Gobernua premiatzen da “egungo osasun-garraioaren ebaluazio bat egin dezan eta berrantolamendu bat egiteko aukera azter dezan. Gainera, eskatzen da “zuzendaritza mediko bat sortzea, Babes Zibilekoari atxikitakoa, Nafarroako osasun-larrialdien antolaketan eta arautzean parte hartuko duena”. Idatz-zati hori I-Ek, ekimenaren titularrak, Bildu-rekin batera sinatutako aldatze-zuzenketa baten ondorio da.

Zioen azalpenean, Izquierda-Ezkerrak bultzatutako ebazpenak Osasun Departamentua premiatzen du “anbulantzien gidarien eta laguntzaileen titulazio- eta habilitazio-betekizunei dagokien guztia” arau dezan, arlo horretan “ez baitu inolako neurririk hartu”, nahiz eta 2012ko erdialdera indarrean sartu zen Errege Dekretuak xedatutako epea bi hilabete baino txikiagokoa zen.

• www.parlamento-navarra.es
• Mozioaren argitalpena (NPAO, 39. zk., 2013-04-15ekoa)