Parlamentuak gaurko osoko bilkuran onetsi duen foru lege baten bidez, sindikatuak eta enpresa-erakundeak finantzatzeko aurrekontu-zuzkidura handituz, 528.000 euroko kreditu-gehigarria ezarri da (352.334 euro sindikatuentzat eta 176.166 euro enpresa-erakundeentzat). Geroa Bai, EH Bildu, PSN, PPN eta I-Ek alde bozkatu dute,  UPN abstenitu egin da eta  Podemos-Ahal Duguk aurka bozkatu du.

Kreditu-gehigarriaren bidez sindikatuen eta enpresa-erakundeen ohiko funtzionamendua ahalbidetu nahi da, beren ordezkagarritasunaren arabera esleituta dituzten eginkizunak bete ditzaten. Honako kontu-sail hauen kargura ordainduko da: Agente sozialentzako eta enpresa-agenteentzako transferentzia, beren erakunde-partaidetzaren arabera (350.000 euro), Enplegu Plana. Prestakuntza-premiak aztertu eta planifikatzeko jardueretan parte hartzeagatiko konpentsazioa (121.000), eta Aplikazio informatikoak (57.500 euro).

Nafarroako Ogasun Publikoari buruzko apirilaren 4ko 13/2007 Foru Legearen 4. artikuluak ezartzen du foru lege bidez arautuko direla Nafarroako aurrekontu orokorrak, eta horien aldaketak ere bai, kreditu bereziak edo kreditu-gehikuntzak emateari buruzkoak badira. Hori horrela, 2016ko Aurrekontuan ezarritako kreditua nahikoa ez denez, bidezkotzat jo da lege hori onestea, kasu honetan irakurraldi bakarra eginda.

• www.nafarroakoparlamentua.eus
• Foru lege proiektua (134. NPAO, 2016-11-14koa)