Nafarroako Parlamentuaren osoko bilkurak, Geroa Bai, EH Bildu, Podemos-Ahal Dugu, PSN eta I-Eren aldeko botoekin eta UPN eta PPNren aurkako botoekin, gaur onetsi duen erabaki batek Nafarroako Gobernua premiatzen du “Nafarroako Foru Komunitateko ikastetxe publiko eta pribatuetan eskolatzeari buruzko arauak alda ditzan, ekitatearen, sozializazioaren eta inolako inguruabarrengatiko diskriminaziorik ezaren irizpideak baliatuta; eta, halaber, prozedura bat ezar dezan, gaur egun ikastetxe jakin batzuetan dauden ikasle-kontzentrazioak zuzentze aldera”.

Onetsitako erabakiaren bigarren puntuan, Foru Gobernuari eskatzen zaio “ikasleak hezkuntza ez-unibertsitarioko Nafarroako Foru Komunitateko ikastetxe publikoetan eta pribatu itunduetan onartzeari buruzko araudia alda dezan, ikasleak onartzeari buruzko irizpide arruntak ezarriz, zeinetan lehenetsiko baita ikasleak eskolatzea beren etxetik gertu dagoen ikastetxe publiko batean eta beren familiek aukeratutako hizkuntz ereduan, eta, halaber, irizpide arruntak ezarriz, aipatu ildotik doan diskriminazio positibo nabarmen bat ahalbidetzeko”.

Hirugarren atalean, berriz, Nafarroako Gobernua premiatzen da “ikastetxeen eragin eremuak ezartzen dituen eskolatze-araudia alda dezan, eskolatze-eremu txikiagoak ezarriz Iruñean eta Iruñerrian eta Tuteran ere bai, ingurunean errotutako ikastetxeak sustatze aldera, ingurune horretan esku hartu eta parte hartu ahalko dutenak”.

Gainera, Foru Gobernuari eskatzen zaio “eskolatze-batzordeak arautzen dituen araudia alda dezan, batzorde horiek aukera izan dezaten eskolatzearen hobekuntzan esku hartzeko eta Hezkuntza Departamentuari proposamenak igortzeko, ikasleak era orekatuan eskolatzen laguntze aldera, araudi orokorra bete beharra ezertan ukatu gabe”.

Nafarroako Gobernuari dei egiten zaio, halaber, “prozedurak ezar ditzan, berandu sartu diren ikasleak aldi baterako eskolatzekoak eta aukera emanen dietenak hurrengo ikasturtearen hasieran ikastetxez aldatzeko”.

Bestalde, Foru Gobernua premiatzen da “alda ditzan 0-3 urteko ikasleak ikastetxe publikoetan onartzeko irizpideak, halako moduan non langabezian dauden familiak ez diren kalteturik suertatuko, lana duten familien aldean”.

Azkenik honako hau eskatzen zaio Nafarroako Gobernuari: “Eskolatzeari buruzko araudia aldatzea, eskaerak plaza hutsak baino gehiago direnean prozesuko irizpide diskriminatzaile bakarrak izan daitezen etxea hurbil egotea edo –justifikatuta– guraso edo tutoreen lantokia hurbil egotea, eskatzen den ikastetxean anai-arrebaren bat inskribaturik egotea, beste arrazoi sozial batzuk, hala nola familia ugaria izatea edo hezkuntza premia bereziak izatea, justifikatuak eta batzordeak baloratuak, aurkeztutako informazioa edota dokumentazioa ikusita, prozesuan edozein puntu osagarri kenduz”.

PSNk eskatu du atal hori eransteko. Gehitzeko zuzenketa aurkeztu du, eta ekimenaren titularrak, I-Ek, onartu egin dio.

Izquierda-Ezkerra foru parlamentarien elkarteak sustatutako erabakiaren zioen azalpenean Mendoza kontseilariak hartutako “konpromisoa” aipatzen da: egungo arauditik aldenduta, “botere-taldeen interes partikularrei erantzuten baitie batez ere, hezkuntza berezitu bat nahi duten horiei (jatorriaren , sexuaren, erlijioaren, etniaren edo maila sozioekonomikoaren araberakoa), lehentasuna ematea etxearen inguruneko ikastetxe publiko batean eskolatzeari, familiak aukeratutako hizkuntz ereduan”.

Proposatzailearen hitzetan, azken hamar urteotako gobernuek bultzatu duten eskolatze-politika horrek “ez ditu sustatu aukera-berdintasuna, hezkuntza-konpentsazioa, sozializazioa eta eskola adineko populazioaren baitako bizikidetasuna”, ikastetxeen eta ikasleen sailkapen baten mesedetan, zeinak ez baitu batere zerikusirik ekitatearekin.

Ildo horretan, “Nafarroan, Hezkuntzari buruzko maiatzaren 3ko 2/2006 Lege Organikoaren arauzko garapenak, zenbait trikimailuren bidez, saihestu egin ditu eskolatzeari dagokionez indarrean dagoen lege horren 81. eta 84. artikuluak”.

Aurrekoaren haritik azpimarratu egiten da ikasleen onarpena arautzen duten foru xedapenek eragin eremuak ezartzen dituztela, “eta eskolatze-batzorde orokorra zein tokiko eskolatze-batzordeak arautzen dituzte, baina ez dira, ordea, konpentsazio- eta prebentzio-jokabiderako arauak, eskolatzeko eta ikasleek ekitatezko sarbidea izateko baldintza mesedegarrienak bermatzera bideratuak”.

• www.nafarroakoparlamentua.eus
• Mozioa (56. NPAO, 2016-04-22koa)